| ◄ Laisse DLXXIX | Laisse DLXXX | Laisse DLXXXI ► |
Quant Païn hont oré, dou tenple sunt insu
Et montent a civals que amenés lor fu ;
Pué s’an vont au palés tot le paset menu ;
Entre Rolant et Sanses sunt d’un dras revestu.
En mi leu de le place est nos duch desandu ;
Ai ! Dés, cun l’esgardent cil Païn meschreü,
Char le duc estoit loing et quarés et menbru ;
La janbe ot loinge et grose, li pié chanbrés agu,
Le chuises plates, et dougiés por le bu,
Anples le spaules, et por le piz gros fu ;
Les main longues et blance, le bras gros e nervu,
Le cols et loing et gros bien demi pié et plu ;
La bouce avoit polie, les dens blans et menu ;
Le nés ot loing a droit, et non mie bosu ;
Vair oil ot et riant, s’il n’estoit ireschu,
Le front anples et aut et de zufet tot nu,
Char il estoit ja chauf, ce avons entendu ;
Blons furent ses zavoil come fin or batu.
La roïne et les dames sunt a baucons desu,
Que non tenoient cuntes for solement dou du :
La poncele l’esgart, que le tenoit a dru
« Hai ! Mahomet », dit elle, « et que a je veü !
« Plus beaus fils enjendrés anc de meres non fu.
« Celui me fait sentir ce que ancor n’ait feit plu,
« Ce est Amor, que m’a mis en sun amoros fu ;
« Ne ancor non hai heü soulement un salu ;
« Il nen soigne de moi : mon espoir ai perdu.
« Sire, feites le moi, char je sui bien de lu.
« Amors, senpres vos ai le mien cors defandu ;
« Hor vos soit qitement et ploiés et rendu ;
« Chant je a vos le bail, haiés merci de lu,
« Que non remagne Amor covert sous sun escu. »