| ◄ Laisse DLXXV | Laisse DLXXVI | Laisse DLXXVII ► |
Ci defeni le consoil l’Aumasor ;
De le chanbre insent li grant et li menor.
In mi le salle funt souner li tanbor ;
Ja estoit soire et traspaisés le jor.
L’eve dounent sergant et servior ;
Pué vont mangier a joie et a baudor.
In cunpaignie le Soudans, son segnor,
Et de troi roi que tinrent grant honor
Manjue insanble le niés l’inpereor
En un vaisels dont chier fu le labor.
Et chant il ont soupé a grant loisor,
A le custume dou tans ancïenor,
Ces estavaus i zitent grant luor ;
A lor ostels s’en vont roi et cuntor.
Soudains apelle Sanson, fils sa usor ;
Livrés li ot Rolant le pugneor ;
Et cil le maine in sa chanbres millor.
Tiel sis donçels irunt dormir cun lor,
N’i a zels non tegne ville o zastels o bor.
Le duc chouzent in le lit plus jensor ;
Le dras dou lit et li grant covertor
Non senble pas d’oume que chaufe for ;
Bien i poïsent dormir a grant loisor
Vint cevalers de le lois Paienor.
Iluec repouse le duch trusque l’aubor.