◄ Laisse DLXXVIII | Laisse DLXXIX | Laisse DLXXX ► |
Cant a ce dit le roi, en sun lit s’est chouzé.
Tost qu’il aparuit jor, ains qu’il fust esclaré,
De part le roi les ait li Païens presanté,
Pué li dit le mesage que li ot inchargé.
Chant Rolant l’ot oï, si en fu strapensé.
« Sire », ce dit Sanson, qui en a ris asé,
« Jelusie de sa fille a mon peres navré.
— De ce », respont Rolant, « non soit il esfraé,
« Ne d’ele ne de nulle, tant i ait grant beauté.
« Et sacés une riens, et si voil quel monté :
« Hom que de tel delit seroit trop intazé,
« Le cris d’onor doit estre de li molt eslunzé.
« Qui de sun bons segnor panse desloiauté,
« Diables li governe tant qu’il ert perilé.
— Hai ! sir », dit le valet, « ne vos en coruzé :
« Ce fu por gaberie et par douz amisté.
— Certes », respont le duc, « que je le croi asé. »
De le maison trover bien estoit afermé ;
A iceste paroles sunt vestuz et chaucé.
Atant evos Soudan o maint de sun berné,
Ensenble a lui les hot au grant tenple mené ;
Iluec hont Saracins Maomet festoié.
Tres en mi leu dou tenple s’est Rolant jenoilé ;
En sun cuer reclama le Rois de maïsté.
« Precios Sir », dist il, « vos souiés mercïé
« De si grant honor chun vos m’avez apresté,
« Que il non m’avint pas de le moie bonté,
« Mais, Sir, de votre grace, glorios sire Dé.
« Senpre vos soit mon oncle le roi recomandé,
« Oliver et Estous et le noubles berné
« Que sunt par mon amor in Espaigne lojé :
« Non soufrés qu’il soient de Païn domajé.
« Et, se il est honors de vostres Deïté,
« Ancor et sans et saus entr’els me ramené :
« Tant que je le revoie jamés n’iert mon cors lé. »