| ◄ Laisse DLVI | Laisse DLVII | Laisse DLVIII ► |
Ai ! quant fu aspre a veoir la meslee !
Mais Pellias hot sue targe gietee
A ses espaules ; a dos poing tient l’espee,
En celu cols mist toute sue ponnee
Et fiert Roulant par si grant randonee
Que bien puet dir que ceste fu coulee.
Pués qu’il venqui e oncis la zars faee,
Jamais par home non li fu tels donee,
Que desor l’eumes, dont fu l’ovre doree,
Trenze dou chercle une grant espanee,
De maintes perres ha fait luissir la pree ;
Pué, au dessandre, fu le targe quassee,
D’un cief a l’autre feindue et detrenzee,
Que non vaut més une poume paree.
Par le grant cols, par la desmessurree
Ha le niés Karles la janbe destornee :
Outre voloir, que bien lui dessagree,
Est reüssé plus d’une grant aunee.
Lor fu de Perse si le giant efrahee
Tote sperance lor stoit in nul tornee :
A pué non chiet la puncelle pasmee ;
Ausi le roi tient la teste enclinee
Chun s’el li fust hors dou bu desevree.
Malquidant chrie a molt grant alenee :
« Bien moutrés, niés, mon amor vos agree. »
Lors fu a Rolant honte et ire douplee,
Et jure Dex chier serra chunparee.
Vers le Païn hot sa voie adrezee :
Homais se gart, que la zouse est troblee.