| ◄ Laisse DCXXIII | Laisse DCXXIV | Laisse DCXXV ► |
Quant ce oï le duch, sachiés, mout i pesa ;
Bien voit qe sens mellee d’iluech avant n’ira.
S’adonqe avist son hiaume, il l’ancommencast ja.
Dist le gregnor : « Ami, une sol pont i a :
« Va por ti compaignons, si les fais venir ça ;
« Pues vos larons aler, mais il nos remandra
« Les chevaus e les armes, qi grant mester nos a.
« Nos somes robeor qi robent ça e la :
« Qui man i puet de nos, mout malemant i va.
« Ja verais qe la rote de nos compaing vira. »
En requoi dist Rolant, qi la teste crola :
« Sor mon chief, bien fu lere qi a laron ambla ;
« Tiel lous quida mangier le chien, q’il lui mengia. »
Pués respondi as trois, e dit q’il alera
A ses troi compaignons e si les amenra.
Mout paürous e foible le baron se monstra ;
A tot le petit pas arer s’en retorna.
Quant fu devant li sien, son hiaume demanda
E si lor dit : « Segnor, or en droit i parra
« Se cil qi veult conqere, conqere se leira.
« Se vos vorois paser cil troi que sunt de la,
« Les chevaus e les armes leiser vos converra. »
Quant Aquilant l’oï, sant sepucre jura
Teil demande peage qi au trui le donra ;
Lor paumoie son gleve e l’escu enbraça,
E broche le destrer ; a Diés se comanda.