| ◄ Laisse DCX | Laisse DCXI | Laisse DCXII ► |
DCXI[1]
El mer entre la nef qe dou port est insue.
De pein, de vin, de cars, de farine molue
D’avaine e de torchier fu asés raenplue.
La mer fu quoie e tendre, qi pués fu irescue ;
Dousemant fu la nef entre li receüe.
L’estormant estoit saje, qi la barbe oit chenue :
A tot jor de sa vie avoit tel art tenue.
A l’entrer dou pelacre n’oit pais sa boche mue,
Ses mains tendi vers ciel, autemant Diés salue ;
Ausi font les barons e le autre gient menue.
L’aute vergne Marie i fu bien manteüe
E san Michael l’angle, qi fit le grant ferue,
Li apostre e li martres e la glorie asolue,
Ke li gart e defande et amaint e condue.