| ◄ Laisse DCLXXVII | Laisse DCLXXVIII | Laisse DCLXXIX ► |
— Sire cosin », ce dit le pugneor,
« Dond n’avez vos lit cil saje outor
« Che nos aprend, dirai vos le tenor :
« Post inimiciciam a remenbrer le iror
« Est la costume, frere, de malditor.
« Litis preterite, dit le nostre autor,
« Non doit saje hon estre remenbreor.
« Non mervelez se non sui blandior
« Enver de vos, car ce seroit folor ;
« Si vos di bien e vos don a savor
« Che plus vos am che jendre o usor.
« Tant con je fu in la gent Paienor
« Le cors Hostos m’estoit davant tutor.
« Se je vos port ne vos a moy amor,
« Da uns a l’autre, bien vos don a savor,
« Non doit pas estre gré valant une flor
« Per droit rason, se bien gardez le vor,
« Che l’uns a l’autre se doit porter onor.
« Plus n’ai parent ne pitit ne gregnor
« Proçan de vos, mais a trestot cestor
« So je tenus, quand por lor buen volor
« Sunt en Espagne, e de moi servior.
« De vos savoie e sui certan tutor
« Che vos jamés, por çaut ne por fredor,
« Non falirois al Roman senetor ;
« Mais ceste jan non cuidoie veor
« Que trové ai, dont au cor ai tendror
« Quan por moi sunt esté in tel langor.
« Non saveç vos le proverb d’ancessor :
« Plus d’une sole perdue berbis pastor,
« Quand la retrove, en oit il joie ancor
« Que de cinquante che ait in stable a segor ;
« Por coi le di, n’a mester splaneor. »
Bien l’entendi, dist Hostos : « Tu di vor. »
Anz che le duc moüst da le contor
Ne ch’el montast desor le misador,
Garda sor destre e vit l’enperaor.