◄ Laisse DCLXXIV | Laisse DCLXXV | Laisse DCLXXVI ► |
A l’aconter che fu sor le laris
De dous vasaus che sunt de bonté eslis,
De pieté et joie fu grand le ploreïs.
« Sire Oliver », dit Rolant le marchis,
« Bien en pui dir, e sin soié tot fis,
« De quant je sui estié al regne Persis
« Non fu ma jor mon cor non fust pensis
« Per vetre amor, enbron et amutis ;
« Se le cors fu oltre la mer fondis
« En conpagnie des Paiens Arabis,
« Le niés Girard tenoit le esperis,
« Ne jor ne noit non fu da vos devis. »
Don fu Oliver del parler si aquis
Que bien le mostre d’andos les ois del vis.
A poine poit dir : « Sire, gran mercis »,
Che Salamon, le roi poesteïs,
Vient randonant con hom voluntaris
Veor le duc che or ert revertis,
Che plus le ame ch’ome del segle vis.
Anz que Rolant del tot le coneïs,
Est Salemon del bon cival desis,
For che davant en genellon se mis,
Roland l’acolle disant : « Stez sus, amis. »
Plus tost n’avroit un on un b escris
Con le camoi fu covert de Françis.
Entor lui sunt coru grand e pitis :
Ceus sunt plus lieç che plus prochan se mis ;
Ceus che pueent tocher le auber trelis
De cescuns maus se tenoient garis.
Tel fu la nosse, le tanbor e le cris
Che jeterent François quand l’ont causis,
Que trestoit le air e le poi en tentis,
Disant ceschuns : « Yesus, grace e mercis,
« Che rendu n’ais le ome beneïs. »