| ◄ Laisse DCLXXIII | Laisse DCLXXIV | Laisse DCLXXV ► |
Rolant oï del duc la lamentançe ;
Respond a lui con molt gran piatançe :
« Oliver frer, sauve ta reverançe,
« Enver de vos n’ai feit mesconovançe :
« Quand moi parti da l’enperer de Françe,
« Vos savés bien, san plus membrer, l’ontance
« Qe moi fu feit, n’en fesons remembrançe.
« A celui pont me sorpris tel irançe
« Qe je perdi de tot bien conosançe ;
« De vos ne d’autre n’avoie remembrançe,
« Tan che non fu torné in ma siançe,
« Car vos savez, bien vore est la sentançe
« De celu saje che en son dir comançe :
« Cum furor in cursu, e quand ire t’avançe,
« Currenti cede furori, et abstinançe
« Si feit t’amer ; de li seit recordançe.
« La mercé Dé et de sa gran pusançe,
« Tan ai je fet depois ma desevrançe
« Que la plus part de ceus che n’ont creançe
« En Yesus Cris ne in sa dolz fiançe,
« Dou regne Persians, son torné a l’usançe
« Che nos tenon a le degne Sostançe.
« Veez le fil Soldan, que soz sa brançe
« Tient tot le regne ; feites lui reverançe
« Por mon amor ; bien ve di sens falançe
« Ch’el out por moi gerpi soe habitançe
« E per e mer lassés en gran erançe. »
Dit Oliver, con grand obediançe :
« Por vetre amor lui met en no fiançe ;
« De tot le mien le ferai comunançe. »
De l’enbracer Sanson sen demorançe
Non s’en feinz mie, més enver lui s’avançe,
Enbraz lui tost con molt bele acontançe,
Baise le el vis, puis dit par amistançe :
« Frer, por celui che estoit ma sperançe,
« Senpre serai a vetre comandançe. »
Cil l’in mercie con une dous senblançe.