| ◄ Laisse DCLXV | Laisse DCLXVI | Laisse DCLXVII ► |
Mout fu grant le parole et aïrez le rois,
Car n’i avoit barons, se il n’estoit François
O Baiver o Normans, Bertons et Erupois,
Qu’il ne die son sir : « Deman matin m’en vois. »
Atant es vos Rainer qi leur maudir fi quois ;
Les barons deronpant, cun s’il fusent borjois,
Se veit engenoiller, e con pietose vois
Dir a Carlons : « Biau sir, ne soiés an efrois,
« Tot tans avés regniés et encor regnerois :
« La rien qi vos donoit e donera repois,
« Vos la veïstes ja et huei la reverois,
« Car j’ai trovei Roland e quens Hue de Blois,
« S’ai mon faucons leisiés por venir plus manois ;
« A l’onbre de un arbre les ai veüs tut trois :
« Cescuns tient son chevaus por la rene d’orfrois.
« Sir, mandés li a l’encontre, si ferés qe cortois ;
« E se vos i alés, grant prou de vos ferois,
« Que, qant vos le verés, de voire dir porois :
« J’ai trové la conqise dou païs Espanois.