◄ Laisse DCLXVIII | Laisse DCLXIX | Laisse DCLXX ► |
DCLXIX[1]
« Por Deu », ce dit Rainer, « qant ne me volés croir,
« Venez a tot le men ma boisdie veoir. »
Hostous lieve en estant e jure saint Gregoir :
« Je li venrai de tot, ne m’an pus rimanoir,
« Mais s’il n’ert verité, bien te don a sauoir
« Bien fas a ton demagie le diable movoir. »
Rainer ist de la tende e monte un cheval noir,
Por Rolant honorer metra tot son pooir ;
A loi de fauchoner, qant il reclame a loir,
Veit escriant a prençes : « Venés, q’avant le soir
« Vos mostrerai Huon de Blois el Milon oir,
« Car orendroit les vi sot un arbre seoir ;
« Venés avant, mi homes de mon mestre manoir,
« Vos qi conoisés bien qe non sui da mescroir. »
Lor leiserent François le mangier e le boir ;
Ausi li vont derier cun clerge au prevoir.