◄ Laisse DCLXII | Laisse DCLXIII | Laisse DCLXIV ► |
Li troi sunt desos l’arbre, delés un pré herbu ;
Cescuns tient por la rene son bon cheval crenu.
Segnor, a cele ore estoit de l’ost ensu
Un chevalier de pris, qi de Bertagne fu,
Armés de totes armes ; nen aloit avec lu
Fors qe son escüer, qi li tient son escu.
Le chevalier oit nom Rainer, le fil Baudu,
Si estoit sir de Nant et a Salamon dru.
Dejoste une rivere a dui meslarz veü,
Maintenant le leisa, si a gitez beü ;
Neporqant si doutoit li Poien mescreü,
Environ lui regarde, cum homme aperceü ;
Li troi cheveler a desos l’arbre veü,
Don broche son cheval, si treit le brant tot nu,
Crient q’il fusent Poien, cele part est venu.
Rolant ni nus des autres sunt de seoir moü,
Ains lor dit le niés Carles : « Soiés un petit mu. »
E quant le sir de Nantes a tant avant coru
Que a son grant loisir a Rolant coneü,
Le parler perd de joie, l’enclin e le salu :
Ne poüst un mout dir por lu estre pandu.