| ◄ Laisse DCLII | Laisse DCLIII | Laisse DCLIV ► |
Esbeïs est le duch, ne vos merveillés mie,
Qant il a oï le terme de si cortine vie,
Que ja n’i sanble long dou vespre a la complie.
La citex de qi parle l’angle e sa profecie
Ou il estoit Carlons con sa grant baronie
Ne seit qeil ele soit ni en qele partie ;
Ne seit s’il avoient Panpalonie seisie.
De la paor q’il oit la sang li est füie,
La color li mua, la façe anpaloïe.
Ne poüst un mout dir por l’onor de Pavie.
L’en chevaucheroit bien plus de liegue e dimie
Avant qe de parler avist nulle bailie.
A chief de tor se panse q’il fesoit vilanie
Qant celi veult fuïr c’onques non fu fuïe.
Un penser valoreus e plain de vigorie
I monta tel ou cors qe par pué q’il n’escrie :
« Or vo je tote oncir la pute gent ahie,
« Or voi destrur Espagne e la grant Aumarie
« E Sibilie e Granate, Moroch e Barbarie.
« Se je tant vivre doi, se Deu me benoïe,
« Ja n’avra grant repois cels q’a Deu ne sorplie. »
Quant oit ce dit le duch, cun une chiere pie
Se veit angenoiller sor l’erbete florie :
De ce qe Deu li otroie dousemant l’en mercie.
La respoise qe fist a Gabriel Marie
Fist le duch a li hermite, e dit cun chiere lie :
« Ecce servus Domini : si con lui ploit, si sie. »