| ◄ Laisse CXIX | Laisse CXX | Laisse CXXI ► |
Or sunt François asis a lor soper.
Li niés Marsille feit son cors desarmer
En la cité sor le mastre plancher.
Hei ! com il fu regreté lo destrer !
E du tinel n’avrent que corocer ;
Entr’aus pristrent Rollant a blestenger.
Maint sunt de cels che proierent l’Escler,
Che lui deistrent : « Biaus sir, leisez ester
« Ceste bataille contre cist averser.
« Quant l’amiré vos a feit gioner
« De tante gient par la ville garder,
« A nostre hoïe vos fist le roi proger
« Che deüsez ci dedanz habiter ;
« Ne vos rova tiel cose encomencer.
« Feites lui, scire, cis presoner mander
« E comandez dan Rollant a Maufer. »
De ce se prist Feragu a irer.
« Machon », dist-il, « vos dont grant engonbrer,
« Ch’en tiel mainere me volez aonter !
« Com peüs je greignor honor trover
« Com de Rollant, se le pués aquiter ?
« De tot les autres che sunt neschus de mer,
« S’oncir le pués, non doroie un diner.
« Afermez sui dou tot sor un penser :
« O de morir o son orguel mater. »
Hestous respont, qe s’apoie a Oliver :
« Feragu scire, mout me pués merveiler
« Quant ne poez Rollant endans mener ;
« Vos le deuissés cun un sol piel tuer. »
Dist Feragu : « Ja n’est il vostre per,
« Che vos rendistes a loi d’un vil berger. »
Ogier s’an rit ; pués sont alez manger,
E pués dormir deci a l’ajorner.