| ◄ Laisse CLXXXVI | Laisse CLXXXVII | Laisse CLXXXVIII ► |
Le roy Karles respond : « Donque vos chevauché
« L’endemain por maitin, quand l’aubor ert crevé ;
« De vos vintimil homes ameneç la moitié,
« Le remanant en soie a ma enseigne leisé ;
« Si avrés condutors qe saront li regné,
« E por devant la ville le milor leu gardé
« O ma ensaigne soit mise e mon gran trief drecé ;
« Mais de tant je vos pri qe ne vos travaillé
« De combatre les murs ni aprochier lor fosé
« Ne aaster lor de bataille, tant qe soie arivé.
— Sire », ce dit dus Naymes, « un poi me pardoné
« Ce m’est avis qe poi de gent li encargé.
« S’il aüst ens la ville de chevalier planté,
« Al secors li seroit trop long termen doné. »
Respond li emperere : « Ne vos en redoté.
« Bien sai ce qe puet fere Malçeris l’amiré ;
« S’il eüst plus de gent qe il non a asé,
« Ja n’enseroit des portes ; trop le croi ensené.
— Syre », ce dit Rollant, « vos dites verité.
« Le duc creoit bien dir, ne doit estre blasmé. »
Dond parti dau consoil, a l’ostel est torné.