◄ Laisse CCXXVII | Laisse CCXXVIII | Laisse CCXXIX ► |
De l’asailir un pué se retreirent.
Dist Anseïs : « Paien, a moi te rent ;
« De toi ferai a mon signor present ;
« Honor avrais se tu batisme prent.
« Quan le batisme non te fuist en talent,
« Gardera toi tant q’un autre acident
« Poroit venir de ton raembrement.
« Tu m’abatis, ja maugré non t’en sent,
« Tant voi en toi valors et ardimant.
« Grant domaje ert, par le mien esïent,
« Si tu moroies ensi vileinement.
« Si tu te rendes, cert je non t’en reprent,
« Car n’ais aïe fors de toi solement. »
Lor respondi Ysorez fierement.
« François », dist il, « tu m’ais legierement
« Pris por paroules e por acointement ;
« Bon goliard serises droitement
« Por gaagner dras e diner d’arçent.
« Bien ais ancui feit plus long parlament
« Que les ancestres de Grece non firent
« D’aler a Troie por le lor vangiemant.
« To toi de ci, car ja plus non t’entent.
« Uns home est vis, s’il fust ci en present,
« A qui rendroie moi et mon garnimant :
« De lui en fors, mielz de mort me content
« Qe je me mete a rendre basement,
« Dont il en ait onte nul mon parent. »