◄ Laisse CCLVIII | Laisse CCLIX | Laisse CCLX ► |
— Rois », dist Gauter, « chaut sent vestre cervel ;
« Por saint Donis, trou prenés grant revel.
« Non tenés mie Carlon si a toisel,
« S’il non quidast metre tot a masel
« Le rois Marsille et ses felons chael,
« Qu’il fust partis de son meilor hostel.
« Or vos diray sens letre ni seiel :
« Savoir devés que ier fu ou chanbel
« Pris vostre fil : mout i a prous damoisel.
« Se dou rescuir non estes bien isnel,
« Tant vos haete Carles, nostre chadel,
« Quant non volés guerpir vo Lucibel,
« Huei li donra de mort sabor novel.
« Se nel volés veoir sot le flagel,
« Rendez mon sir la ville e le castel.
« Vos fil vos proie, recevés son anel :
« Se non rendés la cité el burçel,
« Mort le verés mesclin e jovençel.
« Vostre enfant voi en autretel fornel
« Com en la boche dou lous le sanple agnel. »
Dist Maugeris : « Mau soi de ton muisel !
« De ma cités, por cist si feit apel,
« Non renderoie le plus chetis crinel.
« Di ton seignor que nel pris un chapel :
« S’il sofle vent, je ai forés mantel. »