| ◄ Laisse CCLI | Laisse CCLII | Laisse CCLIII ► |
« Bel sir Hestou », dit Maugeris li rois,
« Dunt vient a Carles ensi tres grant bofois
« Qu’a son pleisir veul feir et tort et drois
« E croist conquir cist païs en un mois ?
« Ja n’est il mie Espaigne Vormendois.
« Por Mahomet, de voir vos di qu’anchois
« Qu’il ait sol pris cist paleis que veois,
« Tant i avra perdus de ses Franzois,
« Plus non perdi Cesar des Romanois
« La en Tesaile, el doloros tornois.
« Se il atend dous semaines o trois,
« Je li croi metre ou cor un teil efrois
« C’onque Girard, lui ne ses Vïenois,
« Ne li mis teil devant a Maschonois.
— Sir », dist Hestou, « je li fu, ce sachois :
« L’orguel Girart i vi et mus et qois
« E de ses mors tot covert le chamois ;
« Fuïr le vi come batu borgois.
« Quant Carles poigne d’abatre un orguelois,
« Sacés de voir qu’il non vient a gabois.
« Por ce vos pri que prodome soiois :
« Le maitinet un latiner prendrois ;
« Mandés a l’ost enquere et si savrois
« Se Carles tient vos fil en son destrois :
« S’il le tient pris, por moi le reavrois,
« Je ne veul dir por rendre un Espagnois,
« Mais sor le pris rendroit il mielz Artois,
« O voiremant me peseroit a orfrois. »