| ◄ Laisse CCCXXVII | Laisse CCCXXVIII | Laisse CCCXXIX ► |
Endementer che Rolant dist ensi,
N’unt aleç guaire che Gerart garda e vi
Venir les host dunt vos aveç hoï.
Au primer chief devant fu Maugeri :
Cil les conduit e son fil autresi.
Païn cevaucent, ne funt noise ne cri,
Otante mille a cevaus sunt garni.
La veïseç tant roid epleus bruni,
Tantes banderes, tant penons colori,
Tant blanc aubers, tant heum a or brusti,
Tant bon çevaus e tant mul Arabi,
Tant triés carjé de soie e de sami,
Pan cuit e çarn e doplers e torti :
Pois ch’Alixandre reis Daires desconfi,
Unch ost plu rice d’un regne ni parti,
For l’ost dan Çarles, de celui ne vos di.
Des or lor heumes e des escuç ausi,
De fer de lances, des confanons sarti
Relust les hair une lieue e dimi.
Le duch Gerart, cun un semblant ardi,
Rolant le mostre tant tost ch’il le çausi.