◄ Laisse CCCXLI | Laisse CCCXLII | Laisse CCCXLIII ► |
Le chief de tuit, roi Baligant, comance
A guise d’ome che mout avoit siance ;
Tuit se tairent, ch’il n’i oit criç ni tançe.
« Signor », feit il, « sol por la delivrance
« De cist païs, che oit tiel penitance,
« El remanant in autreteil balance,
« Avons ci pris estaus et habitance.
« Deu roi Marsile sai che ne fu creance
« Ch’en trop repois fust nostre demorance,
« Mais por combatre a l’emperer de France.
« Je voil savoir queil est la vostre entance,
« Ou de combatre o d’avoir proveance,
« Ch’en mener guere veul une tenperance
« Acompagnee cun une diffirance ;
« Por ce demant la vostre conoisance
« Che ceschuns die selonch sa consiance.
« Pois se tendrons a cil chi meus sentance,
« Si che li rois, ch’en nos oit grant fiance,
« Por nos non perde nulle bone sperance. »