| ◄ Laisse CCCXVIII | Laisse CCCXIX | Laisse CCCXX ► |
CCCXIX[1]
Avant che fust la cartre defenie,
Voit Maugeris ch’il li vient une ahie,
C’est Sadria, le roi de Pinçonie,
A tot sei mil arcer, chi Deus maudie ;
Rois Charions Sadremainos si guie,
C’est une jent ch’ament cevalerie ;
Roi Sinador fu en lor compagnie
Chi tient la terre c’un clame Orchanie
E destrainç Sarie, une citei garnie,
E Valestraine, ou la negromancie
Trova primer Manigroç de Buçie :
La jent dou val che je vos ai gehie
Por lor ensagne aportent tote fie
Un escoler che un Diables lie ;
Plus ne dotent de mort come de vie :
Tuit les cunfunde le fiuç sainte Marie !