◄ Laisse CCCLXXXI | Laisse CCCLXXXII | Laisse CCCLXXXIII ► |
Dolanz fu l’Augalie quant se voit abatu,
E seili en estant, si enbrace son escu.
Pongant vient Balegant, qe bien l’a secoru,
O lui .v.m Paiens q’erent de grant vertu ;
Son ceval lui renderent et cil monta desu.
Mais bien se est l’enperere dou besoing perceü ;
Il a dit a ses homes : « Naymon avons perdu ;
« Jameis tel conseiler non sera ne ne fu.
« O moi vienent qi m’ament, mes amis e mes dru. »
Lor de toz les prodomes n’i a uns remanu,
E toz le remanent brocerent a un hu ;
Ou verent Saracins, sovre lor sont coru.
La oit maint astes freites et maint escuz fendu
E maint buens chevalers trancié par mié le bu.
Carles derump la prese, si a un Paiens conseü :
Le confenuns portoit Falsiruns li çenu ;
Dou cief deciqu’au piz l’a li roi porfendu.
Gaynes en fiert un autre sor son heume agu,
Qe mort l’abat a tere dou cheval estendu.
Salemons et cont Hue et Riçars le membru,
Sorbués et Anquetins, cil de Saint Meleü,
Le dux Boves Sains Barbe e Guenimer ou lu,
Guendelbuef le Frixuns, qe maint n’a deceü,
Çascuns abat le suen an mié le prez erbu.
Le jor fu a François tiel ardimant creü
N’a cil ne se preisast Hector et Troylu.
Grandonie et Balegant sunt de l’estors isu,
Malçaris et son fil, qe sunt bien avehu,
Se le rois les puet prandre, qe il seront pendu ;
Plus n’i demorasent par le tesor Crasu.
De l’estor partirent, tost s’en sunt esmehu ;
Vers la cité s’en vont por torner a salu.
Iluec fu le vantage da ploisors coneü,
Car qi derier remist mort fu e confundu.