| ◄ Laisse CCCLVI | Laisse CCCLVII | Laisse CCCLVIII ► |
Es pré sot Pampeloine oit mout gran capleisons
Que ferent nos François avec li Aragons.
De cent part oïsés Tios e Bergognons
Crïer, nomer e brair : « Monjoie la Carlons ! »
E Saracin d’Espagne : « Al rois Marsilions ! »
Fiers sunt cels Espanois, orgollos e fellons,
E sunt mout bien armés sellonc lor regions
Des blans houbers e d’elmes, de branç e de blasons.
Mervoille hont bon corage, sin firent mostrasons :
A defendre lor teres dissent che ill ont rasons.
E François challongent a guise de barons
Aragons et Espagne e Galliçe invirons.
Ce fu a un mardi, tot si com nos trovons,
Che encontré se furent a cute d’esperons.
Peçoier veïssés mil hastes e mil tronchons
E voiler contramont sor ces eumes reons.
Un rois de Sandremonie, qu’il noment Charions
E fu cosin Marsile e neveu Justamons,
La vençançe veult querre del gran fil Falxirons ;
Tot primer i ferra, si urte d’esperons ;
Amïel encontra, le fil al duc Drugons,
E jerman cosin fu Gondelbuef li Frisons.
D’une lançe qu’ill oit desplie un confallons :
Dedans ad or batuç i ot pains trois dragons ;
Ses armes valoient un sestier d’Avignons.
Le Piteïn en fiert par si grant contençons
Au grant col q’il dona samble foldre de tuns ;
Son escu le pecoie, o oit paint troi paüns,
E l’obers li desmaile a loi d’un siglatons ;
El cor li mist sa lance, mort l’abat des arçuns,
E dist : « Ça sui venus droit de Cafarnaons
« Par defendre la terre qu’ancui nos chalunge ons. »