◄ Laisse CCCCXIII | Laisse CCCCXIV | Laisse CCCCXV ► |
La ou li quens Rollant tot primirain laisa.
Gerarz de Rosilons et Hestous apella ;
Ou cinq mil chevalers les depart e schira :
Par devant porte Vals les mist et enboscha,
En un palus sains eve, o mout de cainers a.
A un cors de cheval, quant l’aubor esclarra,
Porunt veoir la porte qe vers Espaigne va.
Bernars lor a apris e dist e devisa
Toz si com dist as autres e mout les en pria.
Quant Hestous l’antendi, de joie s’afiça.
« Se Diex », dist il, « consaint, qe le mond estora,
« Qe dedans puse entrer, cum coise si sera,
« Mal dehait cil que vis recacier s’en laira.
« Qui a estez prodome, or a droit i parra. »
Dou grant orguel q’il oit sa lançe paumoia.
Bernars en oit grant joie, par amor l’acola ;
Proie lui d’ester quoi ; a Diex les comanda.
Por un petit sentier ariere s’an torna
Par devant porte Lice, ou dan Rollant trova ;
De chief en chief lui conte tot si com il era.
Or dune aparuit l’aube, gueres ne demora.