| ◄ Laisse CCCCV | Laisse CCCCVI | Laisse CCCCVII ► |
La nuit chevalcherent Rollant et Oliver ;
Li duzes compagnons li furent et Ogier.
Ce tesmogne l’istorie, bien furent vint miler,
Armez a une gise, blanc et ros a quartier,
Penuns et entresaignes et fort escuz borclier
E mout rices covertes cascun a son destrier.
Li temp, qe nuble estoit, les fist mout trevailer ;
Maint bois trepaserent, maint vaus et maint rochier
E maint villes bruisies des le tans ça arier,
Ou ne puet creature estier ni abitier,
Tant redotent la gere Carlemaigne ou vis fier.
Au paser d’un forest, lez l’euve d’un viver,
Chevaucherent un plans, dunt largie est li santier,
O cantoient li ousiaus por vignes et por verçier ;
De Nobles oïrent li coch en aut cantier
E l’une gaite l’autre apeler e hucer,
Esveilier les dormanz, proier dou bien garder.
Bien veïsent la ville, non sunt si lontanier,
Mais l’oscurtez nes laisent veoir ni figurer.