| ◄ Laisse CCCCLXXXVI | Laisse CCCCLXXXVII | Laisse CCCCLXXXVIII ► |
Li quens desist d’un agus derupant ;
En uns boscaje, o n’oit voie ne sant
Qe il trovast, se fiert demantinant.
Ces brances lui batent parmi son garnimant.
A soi meïsme se guermente disant :
« Ai ! hom gravez de paine et de tormant,
« N’avis jameis repois a ton vivant,
« E començais de mout petit enfant
« A durer paine et estre travaillant.
« Par la vertus dou Roy omnipotant,
« Pois je bien dir qe da mort fui aidant
« A cestui roys vers li fils Agolant,
« Ke hui moi laidi ensi vilainemant.
« Oliver frere, a Jesu vos comand,
« Hestos de Lengles e tuit mes bienvoilant ;
« Ne moi verés, ce croi, a mon vivant.
« Ceval » feit il, « de toi ai pieté grant,
« Quand te devroit coreer ton sarçant
« E je te main por enci travailant. »
Leiron dou quens, droit est qe je vos çant...
En l’ost de France oit un tumulte grant ;
L’un dist a l’autre : « Partis s’en est Roland ;
« Ferus l’a Karles, non sevomes comant. »
Devant son trief de pallie d’Oriant
Ert Oliver, el destre poing un guant ;
En un blïaut s’aloit il resorant ;
De ces novelles se voit esbeïsand.
Por Hestos mande, Girarz e plus de çant ;
Au trief le roi vindrent isnelement.