◄ Laisse CCCCLXXXI | Laisse CCCCLXXXII | Laisse CCCCLXXXIII ► |
A ce qe disoient li baruns natural
Tot ensi pensoient les autres por engal
E conselent entr’aus, por le partir en fal,
De non veoir le roi le vis enperial,
Tant redotent l’eror de lor sir natural :
A lor tendes iront desarmer comunal.
Quant il sunt devalé le pendant d’un costal,
Rollant fist desploier le confanons real,
Soner feit cors et tinbres, tambors et çeremal.
En la cité poierent a murs e a fenestral
Por veoir cele gient qe descendent el val.
« Seignors », dist Ysorez, « vostre nimi mortal
« Dou vestre grant doumaje demenent joie e bal ;
« Cestor ont pris de Nobles le paleis principal ;
« Or reforceront il lor host et lor estal.
— Sire », dist un Paiens, « je fui al batistal
« O fu mort Folqenor, Noblians et Landral ;
« Je conui bien Rollant armez sor son cheval.
« Onques jor de mes euls je ne vi tel vasal ;
« Il ne fendoit nus hon mens que trosqu’al nasal ;
« Plus tost esbarata la prese a Durendal
« Qe un afamés leus ne mangeroit un gal.
« De la gient q’el mena n’i a nus si ribal
« Qe mais ait povertez ne mesais un jornal. »