◄ Laisse CCCCLXXVI | Laisse CCCCLXXVII | Laisse CCCCLXXVIII ► |
Trestoz devinrent homes Filidés l’aduré,
Et il in fist homaje Oliver de son gré.
Quinzes jors sunt ilec Cristïens sejorné,
Tant qe le cont Gerarz fu alques resané.
Quant il puet chavaucher, n’i ont plus demoré ;
Lor ernois torserent ; les muls en vient cargé.
E Diex ! anc ne veïstes si tres grant richeté
D’or et d’argient, de pailes, com il en ont porté,
Estier farine et cars et formant et claré,
Dont bien .m. charetons cargiez en ont mené.
Des homes covertiz de la bone cité
Mena Rollant .iim. des mielz enparenté ;
Al remanant a mout lor sir recomandé ;
O lui ne le mena, car trop estoit plaié ;
A Diex le comanda et a sa majesté.
Un petit avant l’aube se sont acaminé ;
Voir qe mil chevalers a chevaus bien armé
Aprés cels de la ville lor a Rollant leisé.
Homeis efforce ystorie et sermons bien rimié
Tot si come Carlons dou guant pesant feré
Firi Rollant el niés, dunt il fu sanglenté,
Por quoi parti de lui a loi de corocé,
Dont mout en fu le rois de ses barons blasmé
Et il meïsme en fu irez et adollé.