| ◄ Laisse CCCCLXXIV | Laisse CCCCLXXV | Laisse CCCCLXXVI ► |
Esconfit sont celor a duel et a tormant
Qe doumajer en fu douz France cuidoient ;
Plus de cescuns milers en moruit de .iiic.
Se lor men ne vinist le jornal solement,
N’en escampast un seul, par le men hescïent.
Ec vos la noit venue el grant oscurament ;
Par defaute de jor et por reposement
S’en tornent en la ville la honorable gient.
Des villans de peïs et de noble ensement
Plus de mil ont menez por pandre contrel vent ;
Nes aüsent gariz ni tesor ni argent
Fors qe la Deu mercé et li batiçament.
En la place de Noble li quens Rollant desant ;
Por le mastre degrez en monte el pavimant ;
Ilec a treit cescuns de dos son garnimant.
Les tables sont covertes, les barons laverent.
Anz qe Rollant lavast, Anseïs al poing prent
Et alerent veor Gerarz premerement :
Le quens le conforta, e dist enterement
Com avoit abatus des Paiens l’ardiment.
« Mon seignor », dist li dus, « or n’i a mal nïent ».