| ◄ Laisse CCCCLXVII | Laisse CCCCLXVIII | Laisse CCCCLXIX ► |
CCCCLXVIII[1]
Quant Rollant a ohie dou Paiens la menace,
Veillantins lui stratorne q’encontre lui s’aface ;
A onor ne se tient quant un seul Turc le caçe.
Atant ec vos celui, qe son morir porcace :
Veit ferir le niés Carles en l’eume sor la face ;
Anc ne le puet forfere vallant un cor de vace,
Mais le brant descendi, qe detrence la lace.
Dunc feri lui Rollant : malement le solace?
L’eume lui trence tot, ou reluit la topace,
La moité de la teste o tot le destre braçe
Li feit voler ou camp. Or oiez qel desgraçe !
Satanas s’aparoile qe dou cors l’arme race.
Un jentil soudoier c’om apelent Hustace
A pris le bon destrer (croi qe lui mester face) ;
Sor cil monte, et le suen s’an fuit par mié la place.