| ◄ Laisse CCCCLXIV | Laisse CCCCLXV | Laisse CCCCLXVI ► |
Le jor sist Folqenor sor un destrer isnel ;
Blanz fu d’andeus les flans, si avoit le piz morel,
La crope avoit vermoille come feu de fornel,
La teste tote blance plus qe pene d’ousel,
La crine avoit noire com fust pante a penel,
La jambe longe e grose, le piez copiez e bel.
Devant Cataine, el bois pres Mongibel,
Le prestrent marchaanz, qe asez i ourent revel ;
Tot un jors ajornee par vals et par moncel
Corroit il de randons, n’i süeroit la pel.
Armez stoit le Paiens et d’eume et de clavel ;
La lance paumoiant, s’an vient tot un vaucel
E veit ferir Ranbauz, un soudoier novel
(Nez estoit de Borgoigne et sire d’un castel) :
Le colp sembla perons q’ensist de manganel,
Qe ne escuz ni obers ne li vaut un mantel ;
Son esplié li conduit tres par mié le forcel ;
Jamés de sa soudee n’en paiera penel ;
Mort le feit averser par dejoste un roisel.
La oit une bataile et un estorme fel ;
De mort e d’abatuz joncherent le praiel.
Qui donc veïst Rollant com les meine a masel :
Ne feit colp tan legeir qe n’aut trosqu’al cervel.