◄ Laisse CCCCLIX | Laisse CCCCLX | Laisse CCCCLXI ► |
Le jor fu biaus e cliers a celle començaille ;
Endroit ore de vespre comencent la bataille.
Filidés ne demore qe primers nes asaille
Paumoiant son esplié o la baniere baile ;
As Paiens escria : « Mauvaise garçonaille,
« Tot estes mort e pris ; ne cuit qe riens vos vaille
« Machons ne Trivigant, les Diex de fause taille. »
Noblians le conuet a l’ansaigne de paille,
Al cors e a la parole q’il feit de desfiaille ;
Il broce le destrer, semblant feit qe l’entaille :
Si an droit s’entrefierent com esparvier sor quaille.
Le fiuz al roi Gilares merveilos coup lui baille :
L’escuz al convertiz deromp et escartaille ;
Par le flanc li detrençe dou blans oubers la maille,
Tres par mié le costez la cars decoupe e taille ;
Mais le coup Filidés fu pués de greignors vaille :
Tot lui trance l’escuz e l’oubers lui desmaille ;
Garnimant q’il oüst n’i vault une toaille ;
Une toise de l’aste lui mist par mié l’entraille,
Si qe lui detrença tres par mié le coraille ;
L’arme parti dou cors qe remist pers et paille.
Filidés ceit a terre, qe pasmant se travaille ;
Plus de mil chevalers le voit, qe por lui braille ;
Par lui ferunt encué sanglant mainte ventraille.