| ◄ Laisse CCCCLVII | Laisse CCCCLVIII | Laisse CCCCLIX ► |
Le jor crïent François : Monjoie Carlesmaigne.
Le nom fu dit a toz, n’a celui ne l’apraigne.
Avant qe le niés Carles ensist fors en la plaigne,
Comanda Berengier q’en la citez remaigne
A mil buens chevalers q’il lui dona en compaigne ;
Pué ensi de la porte, covers d’une entresaigne,
La lance paumoiant (ne sai com ne la fraigne),
Meneçant soz son heume le pute gient grifaigne.
Folqenor les regarde, a Landras les ensaigne :
« Encui avromes, frere, perilose bragaigne.
« Perdue avomes Noble ; ne cuit qe mais se taigne
« Ne citiez ne castel ni bors en tote Spaigne.
« Li niés au rois de France, qe nostre lois desdaigne,
« Parti de Pampaloine por venir en gaaigne ;
« Mout oit bon espions qe lui dist nostre ovraigne
« Dou partir qe je fis, dont est droiz qe m’en plaigne.
« Perduz i ai mon frere a la lance maagne ;
« De vivre nen donroie humais une castaigne.
« Morir veul en l’estor, ce qe puet m’en avaigne,
« E tu t’en tornaras, dous frere, ou ta compaigne. »