◄ Laisse CCCCLIII | Laisse CCCCLIV | Laisse CCCCLV ► |
Sor la tor dou palés a une large fenestre
Se est apoiez Rollant, et Filidés a destre,
Et percuet tant ensaignes de blanz e de celestre
E tant heumes a or et tant rice sorveste,
Filidés demanda e dist quant il puet estre.
« Sire », dist li convers, « quant ils firent moveste
« D’aler a Pampaloine envers la Franche geste,
« Quatre mile furent, cescuns destrier en destre.
« Troi tant nos en promist Balegant nostre mestre
« Por cevaucer vers France, a la plus aute feste,
« Delivrer nostre terre por doumagier la vestre.
« .xii. mille seront sta pute gient robeste.
« Voir qe cels païsanz, qe la vient vers senestre,
« Seront bien plus de mil de gient de nonpoeste :
« La plus pars sunt vachiers et gardeor de beste
« Qe dou païs de Noble laborent la foreste ;
« Quant moustromes le feu sor ceste tor alcestre,
« Vienent por reveiler la divine Majeste.
« Ai las ! qe non ai gé pris l’aige sor ma teste
« Qe segure les armes dou Paradis celeste !
« Plus m’en istroie tost qe quarel de balestre
« A morir entre lor o rendre a Diex sa enpreste.
« Fa moi batiçer, sire, s’ais ci ni cler ni prestre. »
Quant Rollant l’antendi, a mervoile li plestre ;
E dist : « Loial me sanbles e plains d’uevre honeste. »