| ◄ Laisse CCCCL | Laisse CCCCLI | Laisse CCCCLII ► |
Or a Rollant li quens son tallant et ses bon ;
Les Paiens feit garder sains nulle mesprison ;
Filidés en apelle et un suen compaignon :
« Fetes moi ci aportier Apolin e Macon
« E trestoz les ymages de Diex malvas fellon,
« Si les feromes fondre a feu et a carbon ;
« Aprés si les donrai mi home e mi baron. »
— Sire », dist Filidés, « par tiel intencion
« S’il a en vostre gient prestes, cele tençon,
« Feites moi batiçer, je vos en quier le don ».
Adonc Rollant l’acolle et lui dist : « Si feron.
« Primirans mangeromes par itiel devision
« Q’il n’a en tot ma host ne velars ne garçon
« Qe d’ier terce en ça gostast de garison. »
Hec vos sor le palés Hestous le filz Hodon :
Gerarz i feit porter, le bier de Roseillon ;
Li mires l’enbendirent, ja n’i ert doteison ;
En une painte cambre de l’estorie Platon,
O le cours des estoiles fu escrit environ,
La le ferent chougier sour un lit large e bon.
Asiez fu regretez dou Roman campion.
Hestous en jura Cil qe maint en Aquilon
Se le duc muert des plaies, toz les Paiens qi son
Retenuç en la ville tot ensemble morron.