◄ Laisse CCCCXLIX | Laisse CCCCL | Laisse CCCCLI ► |
Quant lor a la bonté au quens Rollant contee
Filidés as Paiens qe lor loi ont lasee,
La baniere Carluns, qe lor fu envoiee,
Mestrent sus en la tor ; el vent l’ont desploiee ;
E cele au roi Marsile ont contreval rüee :
En place fu trestote rompue et espernee.
L’aute ensaigne a quartier, qe tant fu redotee,
Sor le plus aut crinel dou palés fu pousee.
A cestui pont fu peis d’anbe part escrïee.
Par le comant Rollant fu roberie veee,
E, qi plus i robast, la teste avroit copee ;
Mais autre grant richece lor ert abandonee.
Adunc fu do palés la porte desfermee
E la gient par desus ensanble desarmee :
Qi avoit arbalestre, s’a la corde trençee.
Li quens Rollant desent, s’a remise la spee ;
El palés est montez a mil de sa masnee.
Ainz qe fust sa vantaile a ses spales getee,
Tote la gient Païne i fu davant menee :
Par davant la persone qi tant par fu senee
S’anjenoilerent tut, merci li ont clamee
Qe tote l’a li quens a sa gient delivree.
Par consel Filidés ou la chere membree
Fu la gient Saracine retenue et gardee,
Dedanz un grant palés et mise et ordinee,
E ceschuns bien serviz de quant qe lor agree ;
Mais n’en ert un lasez si ert la carn lavee.