| ◄ Laisse III | Laisse IV | Laisse V ► |
Le roi feit montier Sanses, por la main l’oit cobré ;
Pués sunt le petit pas enver l’ost civacié.
Le roi conte a Rollant com Sanson fu tüé
As murs de Pampelune l’amirable citié,
Ond sera mout dolant tant q’il sera vençié.
« Sire, si serai jé », dit Rollant l’avoé,
« Mes de cose q’est morte om n’i a recovré ;
« A demenier plus duel teng je grand folité,
« Mes proier por sa arme le Roi sacrifïé
« Ch’en suen saint Paradis il l’ait hui aoberçé ;
« E si croi bien qe ja il li soit aporté,
« Qand en suen saint honor fu en Spagne tüé.
« Se Sanson est perdus, Sanson est recobré
« Qe ni est mie pis de cors e de bonté,
« Si ne croi pas q’il soit le çinçe jor pasé
« Q’a plus de .IIII. mille avront le cief coupé. »
Tant tost come cist mot il oit dit e finé,
Voit venir le çamin tot covert e rasé
De Frans e d’Alemans, qi a cival, chi a pié ;
Baourdant vont encontre, girlandes ont porté ;
Cascun avoit suen heome as espales lacié
Pour doute q’il n’insist Mageris l’amiré,
E, qand l’encontrerent, autemant ont crïé :
« Diés ! qe bien viegne la flor de Crestenté ! »
E qand le duc li voit, tendremant a ploré
Por la gient q’il veoit qi menoit tiel pieté,
Car cil ert plus joiant qe sol avoit tocé
Ou lu o la coverte dou detrier sejorné.
Neo laserent aler, qand le roi oit crïé :
« Or civauciés avant, frans barons onoré,
« Trosqement a ma tende ; la l’avrons festoié. »
Adonc s’en vont çantant a mout gran alené,
Disant : « Hec est dies q’avons tant desiré,
« Quam fecit dominus. Il en soit mercïé,
« Quand rendu n’a la flor de olité :
« Huimés serons tretuit aluminé,
« Qe ja qart an somes stiés avoglé. »