Ballades (Charles d’Orléans)/Ballade XIX
Je n’ay plus soif, tairie est la fontaine ;
Bien eschauffé, sans le feu amoureux ;
Je vois bien cler, jà ne fault qu’on me maine ;
Folie et Sens me gouvernent tous deux ;
En Nonchaloir resveille sommeilleux ;
C’est de mon fait une chose meslée,
Ne bien, ne mal, d’aventure menée.
Je gaingne et pars, mescontant par sepmaine ;
Ris, Jeux, Deduiz, je ne tiens compte d’eulx ;
Espoir et Dueil me mettent hors d’alaine ;
Eur, me flatent, si m’est trop rigoreux ;
Dont vient cela que je riz et me deulz ?
Esse par sens, ou folie esprouvée ?
Ne bien, ne mal, d’aventure menée ?
Guerdonné suis de malheureuse estraine ;
En combatant, je me rens couraigeux.
Joye et Soussy m’ont miz en leur demaine ;
Tout desconfit, me tiens au ranc des preux ;
Qui me saroit desnoer tous ses neux ?
Teste d’acier y fauldroit fort armée,
Ne bien, ne mal, d’aventure menée.
Vieillesse fait me jouera telz jeux,
Perdre et gaingner, et tout par ses conseulx ;
À la faille j’ay joué ceste année.
Ne bien, ne mal, d’aventure menée.