Iconologie (Cesare Ripa, 1643)/II/Solſtice d’Hyuer
Solstice d’hyver.
L nous eſt repreſenté par vn Vieillard, qui eſt couuert
d’vne robe fourrée. A ſes pieds ſe void vn Cercle
en façon de Couronne de Bleu Turquin, au
milieu duquel eſt le Signe du Capricorne, & tout
à l’entour du Cercle ſont grauée douze Eſtoiles.
De la main gauche il tient vne Boule, ou ſi vous voulez vn Globe, dont la quatrieſme partie eſt lumineuſe, & tout le reſte obſcur.
Il porte ſous ſon bras vne chevre, & aux pieds quatre petites aiſles, dont l’vne, à ſçauoir celle du pied droit, eſt blanche, & l’autre noire, & celles du gauche ſont toutes deux noires.
Cét Homme eſt peint en vieillard auec beaucoup de raiſons, à cauſe que le Soleil s’eſtant retiré du premier point du Mouton pour s’approcher du Capricorne, ſe treuue auoir fait alors les trois parties de ſon voyage.
On luy donne vne robe fourrée, à raiſon du froid qui eſt en cette ſaiſon-là plus grande qu’en toute l’année.
Il a les pieds dans vn Cercle, au milieu duquel le Signe du Capricorne & douze Eſtoiles ſont remarquables, à cauſe de l’eſloignement du Soleil vers le Pole Antarctique, & tel Cercle eſt nommé le Tropique du Capricorne.
Par le Globe qu’il tient de la main droite, les trois parties duquel ſont obſcures, & la quatrieſme lumineuſe, il eſt demonſtré que durant ce Solſtice la nuict eſt plus longue, & le iour plus court qu’en tout le reſte de l’année.
Il tient ce Globe de la main gauche, pource que le Soleil eſt alors tourné du meſme endroit, c’eſt à dire vers le Pole Antarctique.
La Chevre qu’il tient ſous le bras droit eſt vn animal entierement conuenable au Signe ſuſdit, car comme elle repaiſt ordinairement au plus haut des Rochers, le Soleil de-meſme commence en ce temps-là de ſe leuer ſur noſtre Horizon.
Pour le regard des petites aiſles qu’on luy met aux pieds, elles ſignifient, comme nous auons dit, le mouuement du Temps, dont les trois parties noires denotent la nuict, & la blanche le iour. Que ſi l’on met celle-cy au pied droit, c’eſt pour monſtrer l’inégalité qui ſe treuue entre l’vn & l’autre, dautant que la lumiere precede les tenebres.