Iconologie (Cesare Ripa, 1643)/II/Le Matin
Le matin.
L nous eſt ſignifié par vne belle Femme nuë, ayant
ſur le ſommet de la teſte vne Eſtoille, vn Dard en
vne main, & en l’autre le Cheual Pegaſe qu’elle tient
attaché. Par l’Eſtoille eſt denotée la clarté que l’Aurore nous donne ; Par le Dard, la ſecrete ardeur dont elle nous
enflamme & nous picque ; Et par le Cheual Pegaſe, à qui l’on
attribuë des aiſles, la prompte viuacité des penſées qu’elle inſpire
aux bons eſprits, & principalement aux Poëtes dont elle eſt amie. Quelques autres la repreſentent dans vn Ciel diuerſement
coloré, d’où elle ſeme des fleurs peſle-meſle, & arroſe
meſme de ſes larmes celles que la terre a produites, comme il
eſt demonſtré par ces vers.
Deſia de ſes viues couleurs
L’Aurore peignant toutes choſes
Vient changer en perles ſes pleurs
Sur le teint des lys & des roſes.