Iconologie (Cesare Ripa, 1643)/II/Fureur indomptable
Fvrevr indomptable.
Ovr la donner connoiſtre par ſes effets on peint
vn Guerrier armé d’vne forte cuiraſſe, portant ſur
la teſte vn Heaume, à la main droite vne Eſpée, &
en la gauche vn Eſcu, où ſe void graué vn Lyon,
qui de colere & de rage qu’il a, démembre ſes propres faons.
Car cét animal a touſiours eſté le Symbole d’vne fureur indomptable ;
principalement chez les Egyptiens. A quoy on
peut adjouſter auſſi la figure d’vn Serpent, qui dans les ſaintes
Lettres eſt tenu pour implacable en ſa fureur, lors qu’il darde
ſes trois langues. Ce qu’il ne fait que trop ſentir par eſpreuue,
quand quelqv’vn l’ayant irrité, il s’emporte à vn tel excez de
rage, qu’il ne s’arreſte iamais iuſques à ce qu’il a vomy contre
luy tout ce qu’il a de venin, d’où il s’enſuit quelquesfois
qu’il
creve quand il ne peut ſe venger.
Outre ces tableaux de la fureur, il y en a d’autres qui ne ſont pas moins conſiderables : car on la peut encore repreſenter par vn homme affreux, lequel aſſis ſur diuerſes armes, & ſur pluſieurs inſtrumens de guerre, ſemble fremir de colere & de rage, ayant les mains enchaiſnées derriere le dos.
Il y en a d’autres qui luy font tenir de la main droite vne grãde torche allumée, & de la gauche la teſte de Meduſe, ou meſme vn aſpic, à cauſe qu’il n’eſt point de fureur, ſi grande ſoit-elle, qui ſe puiſſe comparer à celle de ce Serpent, qui fait mourir de ſa morſure celuy qui le touche, & meurt luy-meſme auſſi-toſt.
Les Egyptiens ont pareillement dépeint la fureur par le Crocodyle ; d’autant que cét animal tourne ſa rage contre ſoy-meſme, quand il void qu’il a manqué ſa proye.