Iconologie (Cesare Ripa, 1643)/II/Auctorité d'amour

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 104 a-101).

Avthorité d’Amovr.

ELle ne peut eſtre, ce me ſemble plus grande qu’elle eſt, veu que cét imperieux Enfant de Venus, qui donne des Loix aux plus puiſſans, a pour luy l’Eloquence & la Force, qui ſe voyent icy repreſentées par les deux effigies d’Hercule & de Mercure. Car il eſt indubitable qu’Amour les accorde enſemble quand il luy plaiſt, & les fait agir en ſa faueur. Tellement que ce n’eſt pas merueille s’il gagne tant de victoires, ayant deux ſi bons ſeconds, qui ſe portent par tout où il veut ; & qui adjouſtent de iour en iour à ſes Myrthes de nouueaux Lauriers, par de nouuelles conqueſtes.

Pour demonſtrer cette meſme authorité d’Amour, & ſa merueilleuſe force, quelque-vns dépeignent vn Enfant tout nud, dont le viſage eſt charmant au delà de toute merueille. De plus, ils luy mettent ſur la teſte vne Guirlande d’Iris ; Et de la main droite luy font tenir vne Foudre, qu’il ſemble vouloir darder auec vne extreme violence.

Par ſon age tendre, & par ſa beauté, nous apprenons que les Amans, quand ils ſont ieunes & beaux, ont de tres-grands aduantages pour conquerir leurs Maiſtreſſes. Car bien qu’il aduienne, comme i’ay deſia dit, qu’en leur preſence ils ne peuuent quelquefois ouurir la bouche, tant ils ſont preoccupez de paſſion ; leur ſilence neantmoins ſe rencontrant auecque la bonne mine ; & l’agreement qui leur eſt naturel, ne laiſſent pas d’eſtre en eux vne eſpece de Rhetorique muette, par le moyen de laquelle ils ne perſuadent pas moins bien que par les ornemens du langage.

Quant à la Couronne d’Iris, elle n’eſt pas donnée à l’Amour ſans vne grande raiſon, cette Plante, comme le remarque Lib. 60. Pierius, eſtant le vray ſymbole de ce que l’Eloquence a de plus aimable. De là vient auſſi que le Prince des Poëtes Grecs, pour dire que les Ambaſſadeurs des Troyens eſtoient tres-eloquens, ſe ſert de cette façon de parler, qu’ils ont mangé de l’Iris, comme s’il vouloit monſtrer par là que leur maniere de s’exprimer eſt elegante & fleurie.

La Foudre qu’il porte eſt pareillement vn Hierogliphe de ſon pouuoir, puis qu’il ſemble l’auoir arrachée à Iupiter meſme ; afin de ſe rendre redoutable non ſeulement aux Mortels, mais encore aux Puiſſances celeſtes.