Iconologie (Cesare Ripa, 1643)/I/Vie courte

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 199-204).

Vie covrte. CLXIX.

ON la repreſente par vne Femme, qui a ſur la teſte vne Guirlande de diuerſes fueilles, ſur le ſein la figure de l’Hemorobion, petit animal volatil, en la main droite

vne branche de Roſier, auecque ces mots à l’entour, Vna dies aperit, conficit vna dies, c’eſt à dire,

Elle s’épanoüit, & ſe paſſe en vn iour,

& en la gauche le poiſſon appellé Seche.

L’homme eſt ſi amoureux de la vie, qu’à l’exemple de Theophraſte, il ſe faſche de ce qu’elle n’eſt auſſi longue que celle des Cerfs, & des Corneilles ; Alleguant que ſi cela eſtoit, il en ſçauroit plus parfaitement les Arts & les Sciences ; au lieu qu’il luy faut mourir ſur le point qu’il commence d’en auoir quelque teinture : Mais Saluſte eſt bien d’opinion contraire, & dit que ces plaintes ſe font en vain, & que l’induſtrie manque à la Nature humaine pluſtoſt que le Temps. Par où il veut faire voir, Que l’homme n’en a que trop, s’il le veut bien employer à l’acquiſition des Diſciplines & des Vertus. Cela n’empeſche pas toutefois que la vie ne ſoit courte en effet, & qu’à la bien conſiderer, elle ne s’éuanoüiſſe comme vn ſonge.

Cette Figure eſt pour cét effet couronnée d’vne Guirlande de fueilles, pource qu’auecque la meſme facilité que le vent les abat, le moindre accident nous porte par terre : Tellement que nous pouuons bien dire, que noſtre aage quelque verd qu’il ſoit, perd ſa vigueur inſenſiblement, comme on void les fueilles des arbres deuenir ſeiches en vn inſtant, & ſe deſpoüiller de leur plus belle verdure.

Par l’Hemorobion, qui eſt vne eſpeche de mouche aſſez grande, Plin. 11. cap. 36. & auſſi-toſt morte que née, nous eſt pareillement ſignifiée la courte durée de la vie, qui comme dit Antiphon, eſt la priſon d’vn ſeul iour, puis que tous les autres y ſont compris.

Cette fragilité des mortels ne peut mieux eſtre comparée Ath. lib. 15. qu’à la Roſe, qui naiſt la derniere des fleurs, & meurt la premier : Ce qui fait dire à vn grand eſprit, ayant à conſoler ſon amy ſur la mort de ſa fille,M. de Malherbe.

Mais elle eſtoit du monde, où les plus belles choſes
    Ont le pire destin ;
Et roſe elle a veſcu ce que vivent les roſes,
    L’eſpace d’vn matin.

& ce fut pour la meſme raiſon que le Pape Leon vnzieſme prit cette fleur pour deuiſe, auecque ce mot, Sic florvi.

Quant à la Seche qu’elle tient en main, c’eſt pour faire voir De Anim lib. 5. c. 18. auec Ariſtote, Que comme ce poiſſon ne dure guere, & ſe voit touſiours guetté, ou par les peſcheurs, ou par les autres poiſſons, qui luy font vne continuelle guerre pour l’engloutir ;

L’homme de meſme ne peut s’aſſeurer d’eſtre long-temps dans le monde, & deuient la proye ou des autres hommes, qui s’en deffont par diuers moyens, ou de la violence du Temps qui deuore tout. Car comme a fort bien dit le meſme Genie que ie viens de citer,

M. de Malherbe

Le Temps d’vn inſenſible cours
Nous porte à la fin de nos iours ;
C’eſt à noſtre ſage conduitte,
Sans murmurer de ce faut,
De nous conſoler de ſa fuitte,
En le meſnageant comme il faut.