Iconologie (Cesare Ripa, 1643)/I/Sort
Sort, ou destin. CLVII.
N le repreſente par vne Femme bizarre, & qui eſt veſtuë
d’vne Robe de couleur obſcure, tenant vne
Couronne d’or de la main droite, auec vne Bourſe
pleine d’argent, & de la gauche vne Corde.
La Couronne d’or & la Corde ſont des enſeignes de ce qu’on appelle bon & mauuais Deſtin. De vous dire au reſte s’il en eſt vn, ou s’il n’en eſt point ; c’eſt à quoy ie me trouuerois bien empeſché, s’il s’en falloit rapport aux reſueries des Anciens, qui ont eſté ſi fols que d’y aſſujetir Iupiter meſme. Mais ſans m’arreſter à ces fables, qui ſont chreſtiennement refutées par les ſaincts Peres, il me ſuffit de remarquer en general, Que le vulgaire nomme Deſtin l’euenement des choſes qui ſont contre l’intention de l’agent : Ce qui me ſemble aſſez bien exprimé par cette penſée d’vn Autheur Grec, qui dit, Qu’vn miſerable ayant pris vne corde pour s’aller pendre, la ietta bien viſte, comme il eut trouué fortuitement vn grand threſor en la foſſe qu’il auoit faite pour y eſtre enſeuely ; Mais qu’vn peu apres, celuy qui auoit caché cét or ne l’y trouuant plus, s’abandonna laſchement au deſeſpoir, & ſe pendit de la meſme corde que l’autre y auoit laiſſée.