Iconologie (Cesare Ripa, 1643)/I/Reconciliation d’Amour
Reconciliation d’amovr. CXLII.
A voicy repreſentée ſous la figure d’vne ieune
Fille, qui porte à ſon col vn beau Saphir, en ſa
main droite vne Coupe, tandis que de la gauche
elle tient deux petits Amours.
L’on appelle Reconciliation vne Amour renouuellée ; ce qui aduient quand on ſe remet bien auec la perſonne aimée : Car tout le monde ſçait qu’vn excez d’Amour engendre ſouuent les ſoupçons & les injures ; A quoy le deſdain, le mépris, & le courroux ſuccedent pour l’ordinaire : Le Poëte Horace a fort bien dit à ce propos, Sat. 3. lib. 2
Qu’en tous les maux qu’Amour a ſemez, ſur la terre,
La guerre ſuit la paix, & la paix ſuit la guerre.
Toutes ces picoteries ſont les creatures d’vne paſſion trop forte : Car plus vn Amant a d’Amour, & plus il s’offence de la moindre choſe ; s’imaginant touſiours que le ſujet aimé ne reſpond pas à ſon affection, & qu’il fait tort à ſes merites. Cependant cét ombrage qu’il ſe donne le porte au deſdain pour quelque temps ; Mais apres auoir bien faſché la choſe aimée il s’en repent à la fin, il ne peut plus tenir ſa colere, il s’accuſe ſoy-meſme, & deſire paſſionnément de faire ſa paix ; Ce qui s’appelle Reconciliation d’Amour,
Entre les vrays Amants l’Amour ſe renouuelle
Par leur propre querelle.
Le Saphir de couleur celeſte eſt vn symbole de cette Reconciliation, pource que ſelon Dioſcoride, il a cette vertu ſecrette de remettre en bonne intelligence ceux qui le portent, & qui ſont mal enſemble : Mais cela tient du ridicule, à mon aduis, pluſtoſt que du veritable ; ſi ce n’eſt que l’on vueille dire, Que les pierreries dont on fait preſent aux Dames ne ſont que trop capables de les appaiſer, quelques faſchées qu’elles ſoient ; puiſque, comme dit Ouide, a. de Art. Amand.
Les dons peuuent fleſchir & les Dieux & les hommes.
Auſſi par la Coupe que tient cette Fille, eſt demonſtré le merueilleux pouuoir qu’ils ont ſur vne Dame, quelque ſeuere qu’elle ſoit. Car ſi elle eſt genereuſe iuſques au point de les refuſer, du moins en ſçaura-t’elle du gré : Comme au contraire, ſi elle eſt d’humeur à les receuoir, ſes intereſts propres l’obligeront à faire la paix auec ſon Amant.
Quant aux deux Amours qu’elle tient par la main, cela ſignifie, Que les Amitiez ſe renforcent apres la Reconciliation, In Amph. Car alors, comme dit Plaute, & les Amants, & les Amis font à l’enuy à qui ſe careſſera dauantage. Ce qui ſembleroit peu croyable, ſi l’experience ne l’aſſeuroit, outre les exemples que les Anciens nous en donnent, & particulierement Elian, parlant de Pauſanias & du Poëte Agaton.