Iconologie (Cesare Ripa, 1643)/I/Oeuure parfaite


Œvvre parfaite. CXI.


ELle eſt aſſez remarquable par la peinture de cette Femme, qui tient vn Miroir de la main droite, & de la gauche vne Eſquierre, & vn Compas.

Le Miroir eſt tel que noſtre entendement, où nous faiſons naiſtre des idées de pluſieurs choſes que nous ne voyons point ; aidez en cecy de la diſpoſition naturelle, bien que toutesfois elles puiſſent eſtre miſes en œuure, par le moyen de l’Art, & des inſtrumens qu’on y employe.

Mais pour bien executer ce qu’on a deſſeigné, il faut ſçauoir premierement, quelles qualitez y ſont neceſſaires ; à quoy le Compas & l’Eſquiere ſeruent de beaucoup : car il faut que nous adjuſtions nos forces à la deſpenſe requiſe, & la choſe imaginée à la réelle : Que ſi l’on fait autrement, apres s’eſtre beaucoup donné de peine, l’on treuue à la fin, qu’on ne peut acheuer ce qu’inutilement on a commencé.

Que ſi au lieu d’vne œuure acheuée quelqu’vn en veut repreſenter vne qui ne puiſſe reüſſir, il n’a qu’à peindre vne Femme eſtonnée, qui regarde pluſieurs toiles d’araignée, qu’elle tient entre ſes doigts : car comme ces toiles, bien que tiſſuës auecque beaucoup de peine & de ſoin, ſont neantmoins trop deliées, & par conſequent ſi fragiles, qu’il ne faut que la moindre choſe pour tout gouſter ; Ainſi les ouurages vains, & qui n’ont point la raiſon pour vray & ſolide fondement, s’eſbranlent tout à coup, & ne ſont pas pluſtoſt eſbranlez, qu’on les void portez par terre.