Iconologie (Cesare Ripa, 1643)/I/Mathematique
![](http://upload.wikimedia.org/wikipedia/commons/thumb/4/47/Ripa_-_Iconologie_-_1643_-_p._107-_mathematique.jpg/250px-Ripa_-_Iconologie_-_1643_-_p._107-_mathematique.jpg)
Mathematique. XCIII.
Est vne Femme d’aage mediocre, couuerte d’vn
voile blanc & tranſparant, auecque des aiſles à ſa
teſte, vn Globe celeſte en la main gauche, & en la
droite vn Compas, dont elle trace pluſieurs figures.
Par ſon aage vn peu auancé, nous ſommes aduertis, Que cette Science eſtant des plus belles & des plus certaines, pource qu’elle n’agit que par demonſtrations, l’on ne doit pas s’eſtonner s’il faut du temps & de l’aſſiduité pour l’acquerir. Par ſon habit tranſparant, Que les preuuves qu’elle donne ſont ſi claires & ſi euidentes, qu’à moins que d’eſtre deſpourueu de ſens commun, il eſt impoſſible de les mettre en doute ; Et par les aiſles de ſa teſte, Qu’auec la force de ſon eſprit, elle s’eſleue à la contemplation des matieres les plus hautes, & les plus ſpeculatiues. Ce qui eſt encore declaré par le Globe celeſte qu’elle tient en vne main ; & pareillement par le Compas, inſtrument propre à cette profeſſion, qui s’eſtudie à connoiſtre les proportions, & les meſures de toutes choſes.