Iconologie (Cesare Ripa, 1643)/I/Force d’amour

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 73-78).

Force d’amovr, par mer et par terre. LXVI.

CEtte Peinture d’Amour eſt vne copie d’vn Emblème d’Alciat, qui en a tiré l’original d’vne Epigrame Grecque, qui luy ſert d’explication, & que i’ay ainſi traduite.

Icy l’Amour dépeint ſans Arc & ſans Flambeau,
Des cœurs qu’il a bleſſez, veut auoir vne offrance ;
Et monſtre ſon pouuoir ſur la terre & ſur l’eau,
Par vn Poiſſon qu’il tient, & par vne Guirlande.

Le meſme Autheur voulant marquer l’Empire de Cupidon, l’eſleue ſur vn Chariot tiré par deux Lyons ; Et en vn autre endroit il luy fait hauſſer la main droite vers le Ciel, d’où tombent ſur luy peſle-meſle des fléches & des flammes, qui cedent à la violence des ſiennes ; Car elles bleſſent, comme diſent les Poëtes, & bruſlent enſemble, ſans que Iupiter meſme en ſoit exempt. Tellement qu’on peut dire

Qu’vn Enfant qui porte des aiſles
Dompte le Pere des humains,
Puiſque pour des Beautez mortelles,
La foudre luy tombe des mains.