Iconologie (Cesare Ripa, 1643)/I/Bon-Augure

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 28-35).

Avgvre. XXIV.

NOvs peignons icy le bon Augure ſous la forme d’vn ieune Homme veſtu de verd, ayant ſur la teſte vne Eſtoille, & vn Cygne entre ſes bras.

La couleur verte eſt vn ſymbole de l’eſperance, & par conſequent du bon Augure, à cauſe que la verdure de la terre nous promet abondamment des biens & des fruicts.

L’Eſtoille qui brille ſur ſa teſte luy conuient fort bien, pource que les anciens Augurs marquoient touſiours les heureux Liu. I. ſuccez, comme il ſe void dans Pierius en ſes Figures Hierogliphiques.

Quant au Cygne, il n’y a celuy qui ne ſçache bien, qu’il eſtoit jadis de bon Augure, tant pour ſon extreme blancheur, que pour eſtre conſacré à la Deeſſe Venus ; ce qui fait dire à Virgile

Æneid.
Tu peux voir, ſi tu veux, dans le vague de l’air,
_________________Douze Cygnes voler.

Au contraire de ce que ie viens de dire, l’on peut peindre le mauuais Augure en foible Vieillard, veſtu de couleur de fueille-morte, & luy faire tenir en main vne Belette ; y adjouſtant, ſi l’on veut, vne Corneille, qui prenne ſon vol du coſté gauche.

La couleur de ſon habit monſtre, Que le mauuais Augure ſe tire ordinairement d’vne mauuaiſe cauſe, qui ne peut produire vn bon effet ; comme il ſe void aux fueilles des Arbres, qui ne perdent iamais leur couleur, que le tronc n’ait perdu ſa vertu.

Pour le regard de la Belette & de la Corneille, on a touſiours tenu ces deux animaux pour mal-encontreux. Alciat le remarque en vn Embléme, où il dit,

Que touſiours la Belette eſt de mauuais preſage,
Lors que dans ton chemin elle s’ouure vn paſſage.

Et Virgile en ſes Eclogues aſſeure le meſme de la Corneille, qu’il appelle fatale,

Du creux d’un Cheſne vieux maintesfois la Corneille
A predit ce mal-heur, etc.

A toutes ces choſes ſe rapporte à peu prés la Medaille de l’Empereur Adrian, repreſentant vn Homme debout, qui regarde voler vn oyſeau, & qui tient d’vne main le baſton Augural, Lib. I. Diu.
Lib. 5. cap. 8. appelé Lituus, que la pluſpart des anciens Autheurs, & particulieremenet Ciceron & Aule-Gelle ont deſcrit aſſez au long.