Iconologie (Cesare Ripa, 1643)/I/Abondance

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 2-3).

Abondance. I.

ELLE eſt peinte icy en Femme de bonne mine, couronnée d’vne Guirlande de diuerſes fleurs, & veſtuë d’vne robe verte en broderie d’or. De la main droite elle tient vne Corne d’Amalthée pleine de fruicts, & de la gauche vn faiſceau d’eſpics de pluſieurs ſortes de grains & de legumes, dont la pluſpart tombent peſle-meſle par terre.

On la repreſente belle & aimable, pource qu’elle ne l’eſt pas moins, que l’Indigence, ſon ennemie, eſt laide de ſa nature, & odieuſe à tout le monde.

Elle porte vne Guirlande, pour monſtrer que des fleurs naiſſent les fruicts, dont elle eſt la creature, & que l’allegreſſe & les delices ſont ſes compagnes inſeparables.

Le verd & le jaune doré, qui eſclatent ſur ſa robe, luy ſont des couleurs extremément propres, pource que l’vn fait eſperer vne belle année, & l’autre vne bonne recolte de grains & de fruicts, d’où ſe forme l’Abondance.

Quant à la Corne d’Amalthée, qui eſt ſi ſameuſe dans les eſcrits des Mithologiſtes, il paroiſt aſſez qu’elle eſt vn ſymbole de l’Abondance par ces vers d’Ouide, où il dit : Met. l. 9

Et de fleurs & de fruicts les Nymphes la comblerent,
Puis aux Dieux immortels elles la conſacrerent.